स्वीकृत क्षेत्रातील कामामध्ये निरपेक्ष वृत्तीने आयुष्यभराचे योगदान देत, देशासाठी भरीव, उत्तुंग कामगिरी करणाऱ्या, कोणत्याही स्तरातील प्रत्येक माणसाला केवळ आणि केवळ अभिमानच वाटावा !!! अशी अभिमानास्पद कार्यकृती करणाऱ्या व्यक्तीप्रती समाजमानाची, जनमानसातील कृतज्ञतेची खूण म्हणून 'चतुरंग प्रतिष्ठान' संस्थेद्वारा 'Person of Pride' अर्थात 'अभिमानमूर्ती सन्मान' हा पुरस्कार देण्यात येतो ! आजपर्यंत या पुरस्काराने सर्वश्री ई. श्रीधरन्, टी.एन्.शेषन्, के.कस्तुरीरंगन्, डॉ.ए.पी.जे.अब्दुल कलाम, डॉ.नारायणमूर्ती, डॉ.रघुनाथ माशेलकर, कमांडर दिलीप दोंदे, (स्व.)अटल बिहारी वाजपेयी(मृत्योपरांत).... अशा ज्येष्ठ-श्रेष्ठ कर्तृत्ववानांना चतुरंग प्रतिष्ठान द्वारा गौरविण्यात आले आहे. यावर्षी, मुंबई मेट्रो रेल्वे निर्माण कार्याच्या संदर्भाने, प्रस्तुत सन्मानासाठी डॉ. अश्विनी भिडे यांची निवड करण्यात आली आहे... !!! त्यांनी Mumbai Metro Rail Corporation (MMRCL) च्या व्यवस्थापकीय संचालकपदाचा ५ वर्षांचा कार्यभार प्रभावीपणे सांभाळला. त्यांंच्या कार्यकाळात आलेल्या सर्व अडीअडचणींवर, निर्माण झालेल्या प्रासंगिक पेच-परिस्थितीवर, निर्धाराने मात करून,  आपल्या बुद्धिमत्तेच्या, धीरोदात्तपणाच्या आणि कौशल्यपूर्ण नेतृत्वाच्या बळावर त्यांनी मुंबई मेट्रोच्या/एक्वा लाईन च्या निर्माणाची कामगिरी पूर्णत्वास नेऊन दाखविली. याचा केवळ महाराष्ट्रालाच नाही तर संपूर्ण भारताला, प्रत्येक भारतीयाला अभिमान आहे...!
हा पुरस्कार प्रदान सोहळा शनिवार दि.27 डिसेंबर 2025 रोजी स. वा. जोशी विद्यालयाचे प्रांगण, डोंबिवली येथे आयोजित केला आहे.या कार्यक्रमाची तपशीलवार रचना लवकरच कळविण्यात येईल.